В Празї ся днесь зачне юбілейный 20. рочник тройднёвой безпечностной конференції Globsec Forum. В чеськім головнім містї ся одбуде другыйраз по тім, як ся ту влони пересунула з Братїславы. Орґанізаторы очекують веце як 2000 гостей зо скоро 80 країн світа, котры будуть діскутовати о посилнёваню обраны і  безпечности, конфліктах на Українї і в Пасмі Ґазы ці о новых технолоґіях. Цїлком бы на акції мало выступити 250 речників в 60 панелах. Головным моттом того рочника є, жебы Европа перешла од бісіды ку актом. Сучасно з Ґлобсеком ся одбуде Prague GeoTech Summit, на котрім ся зыйдуть технолоґічны візіонары, обходны манажеры ці творцёве політікы в різных оборох, котры ся будуть занимати прєніком шпічковых технолоґій з народнов безпечностёв, ці ґеополітіков. Діскутовати будуть о тім, як може Европа ускорити в технолоґічнім розвитку, теда в областях, де днесь сутяжать США і Чіна.

(TASR, Шутіова)