Напрік ростучому неуспіху на фронті є веце як 80 процент Українців фурт пересвідчена о перемозі над Російов, причім 59,5 процента опрошеных безусловно вірить, же войну з Російов выграють. Выходить то з найновшого дослідженя верейного мнінія, котрый выпрацювало Україньске центрум економічных і політичных штудії О. Разумкова. Інформує о тім аґентура DPA. Дальшых 23,4 процента респондентів одповідало на вопрос скоріше гей, і лем 11 процент одповіло ні або скорше ні. Решта опрошеных на справу немала погляд. Дослідженя ся одбыло од 21-го до 27-го марца 2024-го року у вшыткых областях Україны з выїмков Криму і окупованых теріторій в Донецькій і Луганьскій області. На дослідженю брало участь 2020 респондентів у віці 18 і веце років. (TASR, Pkf)