Опозічны страны беруть за неприятельны санкції, котры пропоновав председа парламенту Ласло Ковер за справаня опозічных посланцїв влони в децембру при схвалёваню новелы законника роботы і далшых законів. Подля аґентуры МТІ опозічны субєкты у четверь в Будапешту інформовали, же вывжыють вшыткы правны средства, кедь будуть тоты санкції вочі ним поужыты.

О санкціях зато, же посланцї на пленарнім засїданю законодарного збору 12. децембра перед голосованём о пропозіціях законів фізічно заборонили приступу председаючого к речницькому пулту, у четверь роковала рада Народного згромаждїня. Ковер запропоновав потрестати 29 посланцїв опозіції за аґресівне справаня однятём місячного плату а в припадї далшых девятёх законодарцїв пропоновав зняти єдну третину місячного плату за непристойне справаня і за грубе порушїня правил парламенту коло голосованя. О санкціях іщі буде роковати імунітный выбор. Кедь їх схвалить, потім о них вырішыть пленум парламенту.

(ТАSR, Шутіова)