Переможцьом презідентьскых волеб в Росії, котры ся одбыли од 15-го до 17-го марца, ся подля очікуваня став дотеперішній шеф Кремля Владімір Путін, котрый здобыв  87,8 процента голосів. Выслідкы волеб опубліковала телевізія Россія 24 на основі выслідків exit pollu. Далеко в полі переможеных скінчіли Путіновы троє протікандідаты. Комуністичный посланець Штатной думы Николай Харітонов здобыв подля exit pollu 4,7 процента голосів, член партії Новы люди Владіслав Даванков здобыв 3,6 процента голосів і председові Лібералнодемократічной партії Россії  (LDPR) Леонідові Слуцкому дало свої голосы 2,5 процента актівных воличів. Участь воличів досягла подля дочасных дани веце як 70 процент. Путін, котрый мать 71 років, є при мочі од року 1999. По зміні уставы з року 2020 бы міг знова кандідовати в року 2030 на дальшых шість років. (TASR, Pkf)