Лїтнє купалиско в Кежмарку зачне свою четверту сезону од обновлїня днесь, 10. юла. Навщівницї мусять раховати з обмеджінями повязаныма з підвышеныма гіґіенічныма превентівныма кроками. Дїтьскый базен взглядом на шпеціфічны пожадавкы на ход буде отвореный будучій тыждень. Інформовав о тім Ондрей Мішковіч з оддїлїня комунікації а пропаґації кежмарьского містьского уряду. Навщівницї купалиска будуть повинны дотримовати напрямованя превадзкователя і тримати од себе одступ меджі єднотливцями або членами ґруп найменше два метры. Кежмарьке купалиско є шпеціфічне тым, же ся в нім находить солена ядраньска вода. ,,Є приятельніша і здравша про скору, кедьже не вшыткы добрї знашають высоку концентрацію хлору,” высвітлив Мішковіч.

(TASR, Шутіова)