Четверо експертів Світовой банкы (SB) навщівило в послідніх дньох 15 середніх одборных школ  (SOŠ) в Пряшівскім самосправнім краю (ПСК). Тоты суть залучены до ініціятівы  Catching-Up Regions (CuRI). Завдякы ньой буде у выбраных школах в рамках першой етапы до кінця рока 2023 проінвестовано скоро 40 міліонів евр. Предметом навщівы была презентація скусеностей і проблемів при реалізації єднотливых проєктів. За штирі рокы ініціятівы ся в краю значно змодернізують SOŠ і перепоять ся зо заместнавательми. В першій етапі іде о школы в Пряшові, Меджілабірцях, Попраді-Матейовцях, Кежмарку і Старій Любовні. В рамках ініціятівы ся єдночасно підпорили і малы і середні подникателі, котры сполупрацюють зо SOŠ в реґіоні. Фінанчна підпора з европскых фондів у вышці 10,6 міліона евр ім уможнила купити модерны строї на розвой їх выробы і єдночасно про практічне навчаня.  Конзултанты SB навштівили і школы з другой етапы, де приправують ся проєктовы заміры за веце як 18 міліонів евр. Іде о SOŠ зо Свідника, Бардейова, Вранова над Топльов, Старой Любовні, Попраду, Світу, Гуменного і три середні школы в Пряшові. (TASR, Pkf)