Корпус радників презідента Словацькой републікы Петра Пеллеґрініго розшырив ся о радника про народностны комуніты. Став ним бывшый председа партії Magyar Szövetség – Maďarská aliancia Крістіан Форро. „Кедьже К. Форро уж актівно не анґажує ся в політіці, з презідентом СР доїднали ся на обсаджіню даного місця,“ інформовав у віторок 20-го мая 2025-го року офіціалный сайт презідента Словацькой републікы. Крістіан Форро кандідовав на презідента у вольбах в році 2024. Перед другым колом волеб, до котрого не поступив, офіціално підпорив якраз Петра Пеллеґріні, котрый до другого кола ішов з Іваном Корчоком. Як презідентьскый сайт окрім іншого пише, же новый радник уж абсолвовав їднаня з уповномоченым влады СР про народностны меншыны Акошом Гороньом, з котрым діскутовали о вопросах далшой співпраці. Першым резултатом бы мало быти „скликаня округлого стола представителів народностных комуніт до кінця юна того року в Презідентьскім палаці“. Фото: prezident.sk. (ЛЕМ.ФМ, Пкф)