Місто Снина розшырить співпрацу із польскым містом Каньчуґа посередництвом сполочных шпортовых і културных актівностей. Уможнить то проєкт під назвов Културов і шпортом ближе ку собі, котрый є заміряный на посилніня партнерства меджі інштітуціями і жытелями пригранічных реґіонів. Як інформовала самосправа, цілкова сума на проєкт є понад 74 тісяч евр. „Інвестіція до того проєкту уможнить нелем накупліня шпортового выбавліня, але передовшыткым створить простор на выміну скушеностей і будованя довгодобой співпраці меджі жытелями обидвох реґіонів,“ доповнила самосправа. Проєкт має створити платформу на стрічі шпортовых клубів, умелецькых школ і молодежных орґанізацій із обидвох міст. Реалізація проєкту є напланована на період од юна до септембра.

(Медвідь,  TASR)