В припаді смерти Яна Куцяка і його приятелькы Мартіны Кушніровой дійшло правдеподобно до двойкратнього зраднього вбивства. Мужа вбили правдеподобно стрілов до груди, його партнерку стрілов до головы. На днешній прессконференції в Братіславі о тім інформував презідент Поліцайного збору Тібор Ґашпар. Як далі увів, поліція в неділю о 21:35 годині прияла ознамліня мамы вбитой жены, же ся незнать сконтактовати зо свойой дївков. Поліцайты прийшли к бараку вбитой у Великій Мачі в окресі Ґаланта о 22:30 год. Патроля візуалні дознала ся, же в просторах родинного дому лежить на землі тіло. Сполу із рятовниками і пожарниками вступили до дому. На місці акту было дознане, же в домі суть дві особы вбиты правдеподобно стрілныма поранінями.