Вышеградска штирька бы мала приходити частіше з конкретныма конштруктівныма пропозиціями. Думать собі тото словацька презідентка Зузана Чапутова, котра то повіла і своїм партнерім в часі їднаня на саміті презідентів країн V4, котрый ся вчера зачав на замку в чеськых Ланох. Як далі повіла презідентка СР Зузана Чапутова, „в першый день їднаня ся презіденты  заміряли на V4, єй місце в Европскій унії і вызвы, котрым тото реґіоналне зґрупованя противостоїть. Дискутовали і о розвою в Европскій унії, то значіть о брехіті, міґрації і о еколоґічній крізі.“ Днесь ся к їднаню презідентів V4 припоїли і презіденты Словіньска Борут Пагор і Серьбска Александер Вучіч, абы вєдно зо своїма партнерами дискутовали о односинах Европской унії к реґіону западного Балкану, актуалнім ставі переговорів зо Серьбском і о одказаню року 1989-го. (TASR, Pkf)