Словацька влада дає міліон евр за інформації, котры бы помогли найти убийцю новинаря Яна Куцяка і його партнеркы. Выголосив то в понедільок премєр Роберт Фіцо. Телефонічне чісло, на котре мож кликати, вже публіковало Міністерство внутрішніх справ. Приїмати ся будуть і анонімны доносы. Припадом ся вже занимать шпеціалный тім, в котрім суть представителі Ґенерелной прокуратуры, Уряду шпеціалной прокуратуры, Міністерства внутрішніх справ, Народной кріміналной аґентуры, Презідії Поліцайного збору і Словацькой інфромачной службы. Ґенералный прокуратор Яромір Чіжнарь на своїм бріфінґу вчера повів, же покля ся потвердить, же убийство было повязане із роботов інвестіґатівного новинаря, потім не є можливе, жебы сьме бісідовали, же сьме правна і демократічна держава. В тім припаді „зробить пекло“ і зробить вшытко, жебы ся обяснив цілый припад. Ку убийству выразили ся вчера і представителі політічных партій, председа праламенту і презідент републікы. Вшыткы убийство Куцяка остро одсудили.
(Петро Медвідь)