Влада схвалила компромісну пропозіцію розрахунку на слідуючій рік. Выголосив то премєр Петер Пеллеґріні з тым, же влада ся пустила до авдітів. Розрахунок реаґує і на спомаліня економікы і ґарантує соціалны істоты обчанів, має намагу шпорити на своїм властнім ході. Подля премєра „вырівнаный розрахунок не може быти фетішом“. Влада не хоче брати людям, довг подля премєра навеце знижує ся. Пеллеґріні повів, же є то розрахунок компромісный з міцным соціалным акцентом. Словакія за його словами мусить быти соціалным штатом. „Компроміс выходить з того, же і наперек спомаліню економікы не шпориме і не хочеме шпорити на нашых обчанах. Не хочеме шпорити на сеніорах, молодых людях, родинах, слабых ці хворых. Резервы глядаме скоріше в шпоріню на справованю штату. Бо так собі я з паном міністром представлюю зодповідне владнутя,“ повів словацькый премєр. І наперек тому, же Словакію чекать згіршіня економічной сітуації, розрахунок обсягує доїднаны крокы, меджі котрыма є піднятя платів учітелям, роснутя вытрат про здравотництво ці піднятя мінімалной мзды. Пеллеґріні є пересвідченый, же пропозіцію парламент схвалить.

(Медвідь, TASR)