Велика часть обывателів Словакії в тім року доволенкує в заграничі і  тоты, котры немають купены all inclusive бываня, ся дотуляють і ціны потравин в доволенковых дестинаціях. Покы у векшой часті штатів Европы ціны потравин против мінулому року ся двигли, в сусідніх країнах Вышеградской штиркы суть наперек тому іщі фурт низькы як на Словакії. Выходить то з аналізы Словацького фармарьского дружства. Туніше стравованя понукать і Булґарія, наспак, дость дорожшы потравины найдуть доволенкарї в Італії, Ґреції і в Хорватії. В Ґреції суть ціны  потравин вышшы  о 13,9 % як у нас, в Італії аж о 22%. Наспак, в припаді вшыткых словацькых сусідів є накупованя потравин на доволенкі туньше як дома. В Мадярьску і в Чехії заплатиме за потравины в середині о десятину менше а в Польску докінця о 26,5% менше як дома. О 19% суть тунішы і потравины в Булґарії. (TASR, Пкф)