Депутаты Народной рады Словацькой републікы на днешнім засіданю їднають і о новелі закона о здравотній старостливости, котра управлює і область абортів. Є то єден із остатніх пунктів схваленого проґраму 12-го засіданя парламенту. Пленум зачало восьмый день засіданя продовжованьом діскусії ку новелі закона о газардных грах. В новелі, котра має управльовати область абортів, депутаты з клубу OĽANO пропонують зміны в соціалных кроках про жены, котры роздумують над інтеррупційов, зміну назвы штучного перерваня на штучне закінчіня тяжи, ці обсяжніше голошіня о абортах. Позмінюючі пропозіції ку тій новелі авізовала перекладателька Анна Заборьска з OĽANO, і шефка здравотницького выбору Яна Бітто Циґаникова із SaS.

(Медвідь, TASR)