Довгодобый додж на теріторії Высокых Татер і в околіцї способив, же ся Студеный потік на дакількох містах выляв із свого корыта. Операчный достойник Крайского директоріяту Гасічского і захранного збору увів, же з веце сел мусїли евакуовати людей. Найгорша сітуація є в селї Стара Лїсна, де з готелів мусїли евакуовати десяткы людей. Проблемы мають і валшых селах в Остурнї, в Ждьярю, Татраньскій Яворинї, Маєрах, Подолінцю і Странянах. Засягують ту професіоналны гасічі вєдно з двадсятков добровольных гасічів. Гасічі выконують на місті протиповоднёвы опатрїня, накілько про ступаючу гладину воды грозить і упаджіня моста. Говорить предноста Окресного уряду в попрадї Славомір Кравчак: „Гасічскый і захранный збор в сучінности з поліціов зачали дїяти, з тым же заключіня было таке, же ся ту возить ломовый камінь, котрый сыплють, жебы не підмывало дале міст. Затоже тот є уже в довжцї 3,5 м підмытый. Ломовый камінь ся буде возити аж докы ся тота часть моста цалком не засыпле.“ В окресї Попрад про поводнї і непереставаючій додж выголосили міморядну сітуацію а дакотрых селах 3. супінь поводнёвой актівіты. Веце турістічных пішників на теріторії Татраньского народного парку а уже і Пєнїньского народного парку суть тяжко проходны або цалком не приступны. Марія Петранова зо штатных лїсів ТАНАП-у інвормовала, же цалком не приступна, респектіве узаперта є Біловодьска долина де підмыло часть драгы а лїсници моментално не знають яка сітуація є у высшых пологах. Вышка Суденого потока уже помалы клесать, но сітуація є там надале важна. Вода підмыла пішникы на скоро цїлій теріторії Высокых і Бельяньскых Татер, од Подбаньского аж по Біловодьску долину. Штатны лїсы ТАНАП рекомендують турістам одложыти в тых локалітах на два-три днї планованы туры.
(TASR)
Фото: TASR