Штроф за недотриманя ізолації і карантены по навернутю на Словакію з „червеной“ країны має быти до сумы 5000 евр. Дав бы єй односный орґан верейного здравотництва. Выходить то з новелы закона о електронічных комунікаціях, котров ся мінить і закон о охороні, підпорі і розвитку публічного здоровя. Владный кабінет єй схвалив на понедільковім засіданю з припомінками. Єдночано єй пропонує проїднати в скороченім леґіслатівнім процесі. „Переступліня в области публічного здравотництва допустить ся тот, хто в часі крізовой сітуації не підволить ся рештрікціям, і то нарядженій ізолації або карантенным рештрікціям повязаным із вступом на теріторію Словацькой републікы в повязаню із взником пандемії або пошырьованьом небезпечной інфекчной людьской хвороты,“ пише ся в пропозіції новелы. За тото переступліня має грозити аж споминаных 5000 евр. Премєр Іґор Матовіч вчера по їднаню конзіліюму фаховців єдночасно оголосив, же Словакія натеперь не мусить в повязаню з векшов кількостьов інфікованых запровадити цілодержавны рештрікції. Векшына припадів од зачатку юна до зачаку юла была за його словами привезена із заграніча.

(Медвідь, TASR)