Міністерка школства Мартіна Лубійова зіставать у своїй функції. За высловліня недовіры міністерці в понедільок в парламенті голосовало лем 43 депутатів із 105 присутных. Опозіція ся подля слов Веронікы Ремішовой із руху OĽaNO не вздавать. „Пані міністерка почас цілого міморядного засіданя не вывернула ани єден із фактів, на котры мы звертали увагу, або медії або фундація Zastavme korupciu. Пані міністерку неподарило ся одкликати, но тота діскусія была барз хосенна і мы ся не вздаваме, бо нашов задачов, задачов опозіції є хоронити грошы гражданів,“ повіла Ремішова. Опозіція хотіла Лубійову одкликати про придільованя стімулів на проєкты на баданя і розвиток. Вказовала на одкопірованы посудкы, підниманя пунктів, ці далшы проблематінчы справы коло посуджованя проєктів. Проблемом за думками опозіції є і нерішіня еврофондового шкандалу з літа 2017-го року.

 (TASR, Медвідь)