Новый міністер школства бы міг быти выменованый будучій тыждень. У четверёвій годинї вопросів в парламентї то повів премєр Едуард Геґер (OĽANO). Мено нового шефа резорту повісти не хотїв. Твердить, же покы ся не договорить з презідентков Зузанов Чапутовов, не буде го верейно говорити. Премєр повторяв, же є проти плошному запераню школ в дослїдку енерґетічной крізы. Геґер приближыв, же уволнили 30 міліонів евр на підвышены наклады з енерґіями. Убезпечів, же школам і самосправам ся будуть градити вшыткы наклады за перенешеный выкон. Цїна енерґій ся подля нёго не дать одгаднути. Приступ ку шетріню буде подля Геґера залежати на зряджователёви. ,,Штат піде в тых самых лініях як обчане, будеме редуковати спотребу енерґій о 15 процент,“ доповнив.

(TASR, Шутіова)