Годнотове будованя сполочности неє компютерова гра, на кінці котрой, як ся нам дашто нелюбить, стиснеме ґомбічку вымазати. Каждый наш неуспіх, хыба ці похыбованя або резіґнація на бой о правду може мати в напрямі до будучности траґічны наслідкы подобны тым з перед 74 роками. Конштатував то вчера з нагоды 74. выроча скінченя другой світовой войны в Зволені у своїм выступліню председа влады Петер Пелеґріні з тым кедь підкреслив, же обще спохыбньованя інштитуцій, штату і СР награвать передовшыткым наросту ехтремізму. Окрім того председа влады іщі повів, „як говориме о правді, так собі фурт одкрыто і правдиво мусиме повісти, же Словацьку републику ослободили героїчны войска Червеной армады, румуньской і члены Першого ческословеньского армадного корпусу, і прото, як суть тото офіціалны ославы скінченя другой світовой войны, пробачте, пан презідент, на зачаток сьме мали чути і російску гімну.“ (ТАСР, Пкф)