Презідентка Зузана Чапутова днесь выменовала на пропозіцію Судной рады Словацькой републікы судцю Маріяна Тренчана до функції підпредседы Найвысшого справного суду Словацькой републікы. У своїм приговорі в Презідентьскім палаці повіла, же іде о далшый крок, вдяка котрому може на Словакії повноцінно діяти інштітуція, котру шырша верейность спринимать як малый Конштітучный суд. Чапутова бісідовала о тім, же новый підпредседа має унікатну принагоду брати участь на веджіню суду, котрый є без будьякого бремена минулости і має унікатну принагоду брати участь на будованю інштітуції, котра надвяже на найліпшы традіції словацькой юстіції. Підкреслила, же Найвысшый справный суд є найвысшов інштанційов, котра може охранити граждана перед припаднов свойвольов або нечінностьов державных орґанів.

(Медвідь, TASR)