Премьєр словацькой влады Петро Пелеґріні по вчерайшій навщіві Поландії, де брав участь на ославах 20. выроча вступу Поландії до Североатлантічной аліянції, днесь прилетів до Франції. Окрім іншого бере участь на діґіталнім саміті Орґанізації про господарьску сполупрацу і розвой выступить перед посланцямі в Европскім парламенті (EP). Пелеґріні єдночасно в часі навщівы Франції одкрыє і памятну таблицю присвячену Словакам і Чехам арештованых в колишнім концетрачнім лаґерї Struthof – Natzwiller. Словацькый премьєр завтра бы ся мав стрітнути і з председом EP Антонійом Таянім. Приговорить ся і посланцьом EP в Штрасбурґу і наслідні буде з нима діскутовати о будучності Европской унії. (TASR, Пкф)