Міністерка културы Любіца Лашшакова у четверь пополідне передала десятём лавреатам Премію міністеркы културы Словацькой републикы в областях професіоналного уменя за рік 2017. Тота премія ся удїлює за вызначны умелецькы, твориви і інтерпретачны дії за попереднїй рік або за довгодобый ці цїложывотный принос в окремых областях уменя. Лавреатами Премії міністеркы културы за рік 2017 суть писатель Антон Балаж, геречкы Марія Кралёвічова і Ґізела Вецлова, музичны складателї Павол Зеленай і Ладїслав Бурлас, в области словацького оперного уменя то є Ярослав Благо, дале за презентацію і утримованя народного фолклору были оцїнены Ондрей Демо і хореоґраф Юрай Кубанка, в области вытварного уменя были оцїнены Александер Віка і Іґнац Бізмаєр. „Є то приємне почутя, як все, коли чоловік дістане од дакого добре годночіня за свою роботу. Ці уже єм робив штось в области творивой або і орґанізачной, робив єм то рад а фурт то іщі роблю рад, тїшить ня то а, ясно же то оцїніня чоловіка успокоює,‟ увів Павол Зеленай. Скляна пластіка зображуюча байного окрыленого коня Пеґаса, котра ся лавреатам передавала, є вытвором словацького скларьского вытварника Пала Маха.
(TASR, Цітрякова)