Міністерство здравотництва Словацькой републикы розділило еврофонды на обнову шпиталів. Меджі здравотницькы заряджіня перерозділило 65,5 міліонів евр. Разом успіло 15 шпиталів. Выше 20 міліонів піде до шестьох шпиталів, котры належать фінанчній ґрупі Пента, приближні так само бы мали достати і три здравотницькы заряджіня в пособности резорту здравотництва. Скоро десять міліонів евр піде до трьох самосправных шпиталів, скоро 11 міліонів до двох здравотницькых заряджінь котры належать ґрупі Енджыл (Аґел), приближні 3,6 міліонів евр достане скалицькый шпиталь, котрый патрить під Ґрафобал подникателя Івана Кмотріка. Выпливать то з выслідків першой еврофондовой вызвы, котру резорт здравотницьтва опублікував. Шпиталі можуть фінанції поужыти на реконштрукцію будинків, будованяю урґентів ці на накуп здравотницкой технікы. В рамках єдного проєкту могли жадати максімалні 15 міліонів евр.
(Петро Кімак-Фейко)