Презідентка СР Зузана Чапутова схвалила зміну фінанцованя церьковных і пріватных заряджінь пораденьства і превенції. Фінанцовати ся будуть зо штатного розрахунку. Голова штату у четверь підписала новелу закона о фінанцованю основных школ, середнїх школ і школьскых заряджінь. Нештатны заряджіня пораденьства і превенції ся будуть фінанцовати зо штатного розрахунку на основі кількости дїтей, котрым была додана одборна дїяльность. Зарівно на основі кількости єднотливых выконів одборной дїялности одбытых заряджінём пораденьства і превенції за проходячій школьскый рік. Цїлём зміны є забезпечіти єднакый модел фінанцованя про вшыткы пораденьскы заряджіня непозераючі на їх зряджователя.

(TASR, Шутіова)