Міністер загранічных діл Юрай Бланар прияв у понедільок председу Комітету про загранічны діла Сейму Польской републікы Павла Ковала. Їднаня потвердило выняткове значіня словацько-польскых односин і інтерес обидвох сторон о їх проглубліня на білатералній, реґіоналній ці европскій уровни. Аґентуру TASR о тім інформовало Комунікачне одділіня Міністерства загранічных діл і европскых справ СР. Шеф словацькой діпломації акцентовав значіня словацько-польской господарьской і інвестічной співпраці, кедьже Польща є четвертым найвекшым обходным партнером Словакії. Окреме місце в словацько-польскых односинах має подля нього черезграніча співпраца. Міністер припомянув пропозіцію меморандума о черезгранічнім розвитку, котрый передложыли Міністерству загранічных діл Польщі в новембрі минувшого року. Його цільом є створити рамкы про довгодобу і ціленішу підпору розвитку теріторій поздовж сполочной граніці.

(Медвідь, TASR)