В першім тогорочнім колї подаваня жадостей о здобытя путёвых листків задарьмо на спознаваня Европы посередництвом проґраму DiscoverEU успіло 454 молодых 18-рочных людей. Інтерес о тот проґрам в рамках марцовой вызвы проявило 1945 молодых Словаків. Выходить то з тисковой справы, котру опубліковала Европска комісія (ЕК). ЕК роздать молодым Европанім у віку 18 років цїлково 35.324 безплатных путёвых листків.Успішны жадателї будуть мочі в періодї од 15.юна 2023 до септембра 2024 путовати по европскых країнах сами або в ґрупі максімално пятёх особ. Участницї проґраму можуть путовати по желїзніцї, з вынятками про тых, котры жыють на островах або в одляглых областях. Проґрам DiscoverEU быв спущеный перед пятёма роками а одвтогды ся до нёго приголосило веце як міліон молодых людей.

(TASR, Шутіова)