Мімопарламентна Magyar Szövetség – Maďarská aliancia крітікує, же пропозіція новелы закона о політічных партіях обмеджує ферове політічне змаганя. Не є згодна із знижованьом фінанцій із державного розрахунку в припаді згіршіня економічной сітуації ці зо звекшіньом кворума на вернутя волебной кавції. Представила і властны пропозіції ку закону. На понедільковій пресконференції о тім інформовали лідер партії Ласло Ґубік і председа Петер Еры. Міністерство внутрішніх справ СР передложыло до меджірезортного припомінкогово процесу пропозіцію новелы закона о політічных партіях і рухах. Тота має принести зміны в области їх фінанцованя. Підняти ся має і граніця потребной кількости голосів у парламентных вольбах на здобытя фінанцій із державного бюджету. По новому бы їх мали дістати лем тоты партії, котры по вольбах дістануть ся до парламенту. Новелов ся має підняти і кавція про вольбы до Народной рады СР і Европского парламенту.

(Медвідь, TASR)