Kонсолідація на Міністерстві културы СР ся реално дотулила і фунґованя народностных музеїв, потвердила то і директорка СНМ – Музея русиньской културы в Пряшові Люба Кральова. „Двараз сьме мусили перерабляти бюджет на тот рік. Першый раз знижыти го о 8,5 процента, пак знова о далшых 8,5 процента. Цілково сьме пришли в нашім музею о 17 процент фінанцій в порівнаню з попереднім роком,“ говорить Кральова з тым, же подля їй інформацій в році 2026 має дійти ку далшій консолідації, значіть далшому шпоріню про музеї. Як дале Кральова повіла, же мусили вдяка тому не продовжыти змлувы з двома робітниками, котры мали часово обмеджены контракты. Огрожене є і далше місце. Звертать увагу і на то, же буде мож робити менше подій, позывати менше художників. За кардіналну проблему рахує директорка то, же музей не має жадны грошы на розвиток, на баданя. Музею не были схвалены ани жадны пріорітны проєкты, котрыма бы то могли профінанцовати. Зато ани в тім році не може русиньскый музей раховати з тым, жебы робив теренны досліджіня, ці приготовив фахову публікацію. (ЛЕМ.ФМ, Пкф)