Ревіталізація намістя в Снині є о крок ближе ку реалізації. Місто приправує жадость о ненавратный фінанчный вклад в рамках вызвы Міністерства жывотного оточіня Словацькой републікы на проєкт ревіталізації намістя. Як інформує на своїм вебсайті, цільом проєкту є через водозатримуючі опатріня приспіти ку адаптації на зміну клімату, і звышыти часть затриманой дождьовой воды на тій теріторії. Проєкт має приспівти ку змірніню суха, як і ку звышіню водозатримуючой способности поводя і спомаліню одтоку дождьовой воды. Реалізація ревіталізації намістя подля радниці так само приспіє ку зліпшіню жывотного оточіня, і ку звышіню естетічной і архітектонічной вартости рішеных просторів в центрі міста. Цілковый предпокладаный келчік на проєкт є нецілых 1.660.000 евр, з того сполофінанцованя міста творить нецілых 158.000 евр, о чім ся буде голосовати на найблизшім засіданю містьского заступительства. Проєкт є розділеный на дві етапы. В першім етапі бы ся мала зреалізовати ревіталізація пішой зоны. (TASR, Pkf)