Одділіня про освіту Націоналного совіту Русинів у Сербії зорґанізовало про 24 школярів восьмой класы Основной школы Петро Кузмяк в Руськім Керестурі екскурзію на Словакію, котра одбыла ся в днях 1-го аж 4-го мая. Тота вже традічна екскурзія є нагородов Націоналного совіту Русинів про школярів за то, же вісем років учать ся по русиньскы, на материньскім языку. Школярі так мають можливость видіти, одкыль пришли їх предкы. Школярі были уквартельованы в Требішові, але ходили так само до Земліньской Теплиці, бывшого Керестура. Навщівили і Кошыці, Пряшів ці вызначне путницьке місце ґрекокатоликів – Лютину.

(Медвідь, Рутенпрес)