В пряшівскій літературній кавярні Віола ся днесь одбуде подія під назвов Споминаня на Міша. Буде то вернісаж выставкы мало знамых рісунків Михала Чабалы з пріватной збіркы Мілана Хомы, котрый із Чабалом быв близкый приятель. В рамках вернісажі приде на Чабалу окрем Мілана Хомы заспоминати і карікатуріста Федор Віцо, фотоґраф Ладіслав Цупер і бывша директорка Шарішской ґалерії в Пряшові Марта Гребічкова. Проґрам вернісажі буде доповненый о відеопроєкції з Михалом Чабалом – промітаня фотоґрафій з молодшых років, архівных заберів з умелцьом і документу, котрый з Чабалом зробив куратор Музею модерного уменя Енді Варгола в Меджілабірцях Михал Бицько. Запрошіня на подію прияла і Анна Порачова, котра обогатить проґрам народнов співанков.
(Петро Кімак-фейко)