В неділю 12-го мая в Чертіжнім одбуде ся посвячіня і одкрытя зреконштруованого Цінтеря русиньскых особностей. Реконштрукцію вєдно із селом реалізовала Містна орґанізація Русиньской оброды на Словеньску в Меджілабірцях а Ґрекокатолицька парохія Чертіжне. Святочна подія почне літурґійов, котру в Храмі Вознесенія Господа одслужыть Высокопреосвященый Йона, пряшівскый архієпіскоп і митрополіта. Проґрам буде далше продовжати на цінтерю, де суть похованы такы особности русиньской історії як Адолф Добряньскый ці Юлій Ставровскый-Попрадов. На гробі Адолфа Добряньского буде одслужена і панахіда. Реконштрукцію Цінтеря русиньскых особностей Чертіжне підпорило Міністерство інвестіцій, реґіоналного розвитку і інформатізації Словацькой републікы.

(Медвідь)