Выбудованя меджінародной ціклотрасы Евровело 11 на теріторії Пряшівського самосправного края (ПСК) продовжує. В окресі Стара Любовня ся завдякы успішному черезграничному проєкту подарило перепоїти села долины рікы Попрад з польсков Мусзінов, выбудовати дві лавкы, місця на одпочінок і нове інформачне центрум в Сулині. В рамках проєкту „Новый турістичный продукт – часть трансевропской ціклотрасы ЕвроВело11 Пряшів-Мусзына-Мнішек над Попрадом“ ся зо средства Европского фонду реґіоналного розвоя в рамках проґраму Інтерреґ  V-A Словакія – Польща проінвестовало 3,2 міліонів евр, причім келчік на словацькім боку досягнув суму скоро 1,1 міліонів евр. Ведучім партнером проєкту, реалізуваного од авґуста 2019, є Ґміна Музсина, котрый забезпечував інвестичну часть проєкту, і то выбудованя і оправу ціклотрасы на польскім боку в довжыні 8 км, выбудованя двох лавок через ріку Попрад на трасі Леґнава – Мілік і Андрзейовка-Малый Липник. На словацькім боку за актівіты было зодповідне Любовнянске реґіоналне здружіня міст і сел Стара Любовня. (TASR, Пкф)