Новым директором Музею модерного уменя Енді Варгола в Меджілабірцях буде од 1-го юла Мартін Цубяк. До функції го в понедільок на основі рекомендацій выберовой комісії меновало Заступительство Пряшівского самосправного краю. „Новому директорови жычу много успіхів в його роботі. Меджілабірьскый музей Енді Варгола має своє місце в краї, но і на Словакії. Вірю, же турбулентный період, котрый быв у попередніх роках і місяцях, є вже за нами,“ повів председа краю Мілан Маєрьскый. Цубяк быв од марца того року повіреный веджіньом музею. Як повів про аґентуру TASR, першорядо мав намагу стабілізовати музей персонално і фахово. Музей за Цубяка приготовив дакілько выставок, докінця і в хорватьскім Загребі і директор має много візій. Богатый проґрам хоче приготовити і з нагоды тогорічных 90-ых недожытых народенин Варгола.
(Медвідь, TASR)