Місто Пряшів в минулім тыждні закінчіло проєкт великой ревіталізації публічных пространств на Площі молодежи і сусідньой Площі Духновіча, котрый почав іщі кінцьом літа 2022-го року. Цілковы вытраты на ревіталізацію, в рамках котрой два малы паркы дістали нову подобу, были понад 800 тісяч евр, і векшыну грошей на то місто здобыло з еврофондів. На Площі Духновіча є домінантов народна културна памятка – памятник русиньского будителя Александра Духновіча, котрый є твором русиньской скулпторкы Олены Мандіч-Шіналі і котрый Місто Пряшів якраз в тых днях, по ревіталізації пространств в околіці памятника, почав і з його реконштрукційов. Містьске заступительство міста Пряшів схвалило на тот ціль 14 тісяч евр. В першій етапі оправить ся лем верьхня часть памятника – бронзова скулптура Духновіча. В далшій части, котра ся буде реалізувати в слідуючім році, бы ся мав дати до порядку і мраморовый підставець, головно часть, де ся давають квіткы, бо є в процесі розпадаваня. Окрім іншого зреалізує ся  і нове шпарованя і  наново золотом зроблять ся написы, котры на памятнику суть. (ЛЕМ.ФМ, Пкф)