Найстаршый сканзен на Словакії, котрый належыть під Шарішскый музей в Бардейові, одсвяткував 60 років. Як інформовало Одділіня комунікації Пряшівского самосправного краю, свої народенины одсвяткував в неділю 10-го авґуста 2025-го року, коли  на навщівників чекав богатый проґрам. Сканзен – юбілант, котрого зряджовательом є Пряшівскый самосправный край, дістов з нагоды свого юбілея дакілько подарунків. Першым є проходяча реконштруцкія стріх двадцятьох найвекшых обєктів вдяка проєкту і підпорі з проґраму Interreg Польща – Словакія. Другым подарунком є уточніня датованя выбраных обєктів дендролоґічнов методов, чім ся здобудуть даны, ці найстаршый обєкт сканзену, котрым є дзвоніця із Янонець, быв справды збудованый коло року 1700. Третім подарунком была уж спомянута неділня ослава, в рамках котрой быв і музичный проґрам. Джерело фотоґрафії: ПСК/Фацебоок (ЛЕМ.ФМ, Пкф)