В днях 2-го і 3-го авґуста на горі Звір в Литмановій одбыв ся традічный архієпархіалный одпуст, котрым собі Ґрекокатолицька церьков на Словакії припомянула 35 років од початку зъявлінь Пресвятой Богородіці. Головным пунктом проґраму была недільня архієрейска літурґія, котру одправляв Высокопреосвященый Йона Максим, пряшівскый архієпіскоп і митрполіта. Пред літурґійов быв прочітаный декрет, котрым Святішый Престол уділив nihil obstat, якым вырішыв, же нич не перешкаджать розвиваню маріянськой учты на горі Звір, і оцінив духовны плоды того місця. Кір Йона в проповіді акцентовав, же тото місце перестало быти пустым, одколи на нього почали приходити путници, одколи там Богородіця дала о собі знати, і назвала ся Непорочнов Чістотов, і є на нім присутна. Прямый ефір з одпусту быв высыланый і в STVR.

(Медвідь, фото: Михал Петриляк)