Зачало ся запасіня о елементарну правду, о чім была друга світова война. Повів то председа влады Петер Пеллеґріні в часі упоминаючого акту кладжіня вінців к Памятнику ческословеньского армадного корпусу на Дуклі з нагоды вчерайшого 75-го выроча Дня героїв Карпатьско-дукляньской операції. Як у своїм выступліню повів, „є смутно, же нашы вояці і тоты, котры ся хотіли вернути до отчізны, ся вертали через такзваны ворота смерті і першый раз ся з отчізнов стрітнули в Долині смерті. Тота земля є насправды покропена множеством кровї. Прото ниґда незабудьме, а главні недайме можность днешнім погробкам фашизму, котры нас пробують пересвідчити о тім, же то было інакше. Недайме  їм можность, абы доказали пересвідчити молоду ґенерацію.“  (TASR, Pkf)