Пряшівскый самосправный край оцїнив вызначны особности і колектівы реґіону. Споміджі тринадцятёх пропозіцій о них розгодли на основі одпоручаня выберовой комісії крайскы посланцї. Найвысше крайске оцїніня за тот рік удїлили бывшому директорови Справы і утримованя драг ПСК Владїмірови Козакови, ін меморіам, за цїложывотне дїло, главно за обнову гаварійного ставу драг од року 2004, за велику особну анґажованoсть в розвої реґіоналного цестовного господарьства а заєдно і за особный принос в области черезгранічной співроботы Пряшівского края. Далшыма лавреатами ся стали фолклорна ґрупа Раславічан за довгорічну полуларізацію фолклору і утримованя традіцій вышнёго Шаріша і патер Михал Замковскый за довгорічне місіонарьске дїяня на Словакії і в загранічу. Председа ПСК Петер Худїк в тім роцї одовздав Премію председу ПСК автомобіловому претєкарови Іґорови Дротарови за веце як 40-річну карьєру і успіхы досягнуты в моторістічнім шпортї. Другым лавреатом Ціны председу ПСК ся стала історічка, авторка многых одборных робот і белетрії Нора Баратова, котра здобыла цїну за цїложывотне дїло в области історії, педаґоґікы і културы. За унікатны успіхы в проґрамі Земля співащ і за заховаваня і пошырёваня традічной русиньской културы собі перебрав премію і фолклоріста Штефан Штец.
(Зденка Цітрякова)