Добровольну стаж в Ремеселницькім інкубаторі Ґемер в Рожняві абсолвує в тых днях перша ремеселничка. Є нёв молода абсолвентка Школы ужыткового вітварницьтва Кошіцї Яна Валкова. За найвекшый принос подля властных слов бере скуточность, же за релатівно куртый час ся зознамила з многыма техніками, матеріалами, способами їх оброблїня чі докінця з історіёв конкретных ремесел, выходячіх рівно з реґіону, де ся народила і жыє. Клієнтом інкубатора ся може стати ремеселник за передпокладу, же своє ремесло уж овладать, або є черствым абсолвентом школы зо замірянём на традічне ремесло, респ. ремеселницького курзу. В припадї зачінаючого ремеселника є потрібне превказати ся адекватнов зручностёв і властнов творбов. Єдинов і невыгнутнов подмінков є безплатна реґістрація до датабазы ремеселників і людовоумелецькых выробцїв Кошіцького края. Ремеселницькый інкубатор Ґемер быв отвореный в апрілю 2019. Зрядженый є в Домі традічной културы Ґемер в Рожняві і ёго основнов задачов є підпорёвати людовых ремеселників і людовоумелецькых выробцїв.

(Шутіова, KORZÁR)