Середні школы в Пряшівскім краю понукають в школскім році 2026/2027 про першаків 8 054 вольных місць, вєдно 900 місць про школярів, котры не закінчіли навчаня на основній школі в девятім класі. З того цілкового чісла є 6 235 місць схваленых на 67 середніх школах, котры діють в компетенції Пряшівского самосправного края (ПСК). Час вырішыти де по скінчіню основной школы підуть школярі навчати ся дале мають до 20-го фебруара. То є послідній термін про засыланя приголошінь на середню школу. Наше інтернетове радійо русин.ФМ о тім інформувала говоркыня края Даша Єленьова. В школьскім році 2026/2027 є про будучіх школярів середніх школ приправленых коло 1 630 місць на ґімназіях, веце як 5 520 місць на середніх фаховых, промысловых, умелецькых і шпортовых школах. (TASR, Пкф)