Основна школа з матерьсков школов з навчалным языком русиньскім в Кленовій боює з екзістенчныма проблемами. Є то єдина русиньска повноорґанізована школа. Як про аґентуру TASR потвердив староста села Славоміл Волох, містны не хотять прийти о єдину школу свого тіпу на Словакії. Школі бракує до кінця актуалного школьского року на мзды 50 тісяч евр. Сельске заступительство на своїм засіданю 20-го фебруара жадость директоркы школы о фінанчну поміч з бюджету села не схвалило, кедьже село само має на розвиток 50 тісяч на рік і кебы то дали школі, было бы то про Кленову ліквідачне. Школі вчера приобіцяв поміч міністер фінанцій Ладіслав Каменіцькый. О можности дофінанцованя бісідує і Міністерство школства. До школы в Кленовій на другый ступень ходять і діти з Калной Розтокы, де є так само малокласна русиньска школа.

(Медвідь, TASR)