Выступы різных колективів і ґруп в часі Різдвяных проґрамів дотворять адветну атмосферу в центрі Пряшова. Одбудуть ся в дньох 12.,14.,19. і 21. децембра на дочасній сцені на Главній уліці. В часі тогорічных свят є за словами пресовой референткы Містьского уряду в Пряшові Ленкы Новотной приправеный і проєкт Словакія співає колядкы, в котрім місто Пряшів буде брати участь. „Акція ся одбуде в згоднім часі на різных місцях Словакії і Чехії. Його основов буде, же в часі адветного проґраму ся на цілій Словакії будуть співати штирї згодны колядкы а то: Poďme bratia do Betléma, Do hory do lesa valasi, Šťastie, zdravie, pokoj svätý vinšujeme vám a Tichá noc. Першы тоны коляд зачнеме в Пряшові співати в середу 12. децембра о 18.00 годині,“ повіла Новотна.