Технічны вопросы бы мали быти предметом тридньовых сербско-косовскых їднань під покровительством Европской унії, котры ся днесь обновлюють по довшій перерві. Як інформовала аґентура Associated Press, в проґрамі їднань має подля сербского денника Blic быти і аналіза дотеперішніх їднань і реалізації їх заключінь в практіці. Говорити бы ся мало і о договорі із 2013-го року і вытворіню Общества сербскых сел в Косові, што дотеперь не є зреалізоване. Пріштина так крок спринимать як засягованя Сербії до косовскых внутрішніх справ.
(Петро Медвідь)