Хорватьскый премєр Андрей Пленковіч твердить, же бы ропа додавана через Ядраньскый роповод была трикратно туньша як російска ропа транзітована роповодом Дружба. В понедільок о тім інформовав сервер szeretlekmagyarorszag.hu з одкликаньом ся на телевізю Euronews. Мадярьска ропна компанія MOL і мадярьска влада передтым дементовали, же бы російска ропа через роповод Дружба была дорогша. Хорватія пропонує Ядраньскый роповод як прімарну трасу додавок про Мадярьско і Словакію і твердить, же транзітный поплаток бы міг быти „трикратно низшый“ як в припаді роповоду Дружба, што бы Мадярьску могло принести значне шпоріня в часі роснучіх цін ропы. До Мадярьска і на Словакію од 27-го януара не приходить ропа через роповод Дружба, і сітуація з ропов у тім реґіоні є проблематічна.

(Медвідь, TASR)