Бенаткы зачали у четверь пробовати выберати поплаток од турістів, котры тото місто навщівлять на єден день без переспаня. Цїлём є обмедзити турістічный навал, превентівны крокы челять і крітіцї, інформує  о тім TASR подля аґентуры AFP. Єдноднёвы навщівници Бенаток сі мусять купити пятьевровы листкы, котры їм контролюють коло вступных бодів міста.  У четверь дополідне было проданых приближно 13.000 листків, увела канцеларня бенатьского старосту. Листкы сі мож купити на головній желїзнічній станіцї Санта Луція або онлайн. За вступ без листка грозить покута од 50 до 300 евр.

(TASR, Шутіова)