Сербія мать сім днів на то, жебы рішыла о кроках на забезпечіня додавок палива зо серьбской рафінерії NIS, котру контролюють російскы властници, без єй знародніня, выголосив то вчера презідент Алексантaр Вучіч. Інформує о тім аґентура Reuters. Вашінґтон робить тиск на повне стягнутя російскых інвестицій зо сполочности, котра превадзкує єдину рафінерію в Сербії і покрывать приближно 80% спотребы дізлу і бензіну в країні. Найвекшым акціонарoм в NIS є російска Газпромнефть, котра властнить 44,9%. Далшых 11,3% належыть інвестічній дівізії плінареньского концерну Газпром. Америцьке міністерство фінанцій в суботу (15. 11.) ознамило, же російскы властниці мають час три місяці на найджіня купця. Серьбске міністерство енерґетікы наслідно уточнило, же доба мине 13-го фебруара. В наслідку санкцій банкы одмітли спрацювати плачіня NIS, што серьбскій фірмі кінцьом октобра забрaнило прияти додавкы ропы. Без новых додавок буде мати рафінерія к діспозиції достаток ропы лем до 25-го новембра, інформують о тім жрідла аґентуры Reuters. (TASR, Пкф)