x

Каталаньскый референдум допроводив ґвалт

00

Вчера в іспаньскім реґіоні Каталанія проходив референдум о незалежности. Плебісціт, котрый централна влада в Мадріді бере за протиконштітучный, допроводив ґвалт. Іспаньска поліція вєдно із іспаньскыма ґардами, котры были до реґіону покликаны, намагали ся заперати центры голосованя і боронити голосованю обще. Членове озброєных сил так само конфішковали урны на голосованя ці голосовачі листкы. Тото вшытко переросло до ґвалту. Поліція схосновала на протестуючіх воличів і обушкы а ґумены патроны, котры суть в Каталанії заказаны. Кількость голосуючіх подля іщі неофіціалных резултатів не досягла ани 50 процент, но веце як 90 процент з них было за незалежность реґіону. Подля каталаньского закона о референдумі бы мав реґіоналный премєр до 48 годин по офіціалных резултатах, в припаді, же ся потвердить векшына про незалежность, выголосити незалежность реґіону. Різны коментаторы суть в тій справі скептічны, кідьже вдяка засягованю державных орґанів референдум не сповнив жадны основны условії, котры бы плебісціту давали леґітіміту. Вказує ся і на то, же не были контрольованы голосуючі і так міг єден чоловік голосовати вецераз. Премєр Іспанії Маріано Рахой уж вчера в приговорі повів, же жаден референдум не проходив і днесь має їднати о цілій сітуації з представителями іспаньскых парламентных партій.
(Петро Медвідь)