Делеґація посланцїв мадярьского парламенту з владной страны Фідес, котра мать рїшати споры зо Шведьском і Фіньском перед ратіфікаціёв вступу тых країн до NATO, одыйде до Штокголму 7. марца. Увів то у четверь сервер Hvg.hu з одкликанём ся на тисковый одбор шведьского парламенту, інформує справодайця TASR в Будапешту. Делеґацію веджену бывшым міністром обраны Чабом Гендем і председом загранічного выбору Жолтом Неметом прийме у шведьскім парламентї ёго председа Андреас Норлен. На стрїчі будуть брати участь і далшы шведьскы посланцї. Мадярьска делеґація подля сервера піде асі зо Штокголму просто до Гелсінк. Председа фіньского парламенту Маті Ванганен в середу про фіньскы новины Ілталегті потвердив, же прийме мадярьскых посланцїв.

(TASR, Шутіова)