Европскый парламент апеловав на приятя сполочных правил в рамках Европской унії, котры бы забезпечіли решпектованя прав членів народностных меншын і заборонили їх діскрімінації. Інформовала о тім словацька державна пресова аґентура TASR. Евродепутаты за аґентурныма інформаціями пожадали Европску комісію, жебы выпрацовала і передложыла пропозіцію інштрукції, яка бы задефіновала мінімалны нормы про меншын Европской унії. В інштрукції бы мали быти і ясны крітерії ці крокы заміряны на закінчіня діскрімінації меншын в членьскых державах. Корешпондент узнесіня, словацькый евродепутат мадярьского походжіня Йожеф Надь із партії Most-Híd в інформації про медії выразив, же найважнішым цільом є знижыти чісло ненавистных проявів і проблемів, котры із них выходять.
(TASR)